بدوون وطن ؟!!

هذا كلام أحد الأشخاص في موقع مشهور بالكويت شوفو شلون كلامه مؤثر وأنقله لكم صج عورني قلبي ماعتقد في انسان يرضا يعيش هالعيشه

هاى اخوكم جعبر ولد جعفر انا بدون واعيش بدون وطن وافكر انتحر لاني سويت كل شئ بحياتي وجوازى افغانى ومو قاعد اتغشمر وماكوا اشتغل بمحل تيلفونات عشان اصرف علىاخوانى وخواتى لان ابوى معوق واخوى الكبير يشتغل تعليم سياقه والله كريم وعايشين على بيت الزكاة وعلى الناس الطيبه واحلى انى احب واعيش مثل البشر بس للأسف الكل يبي جنسيه وانا انسان كرامتي فوق كل شئ بس وطنى الكويت سلمتلى المجدي فدائى للوطن الكويت

كما عوتكم لى موضوع عن الاغراض المستعمله للبيع تلفزيون بو طوفه يتعلق بدون حدايد ولا شنكوا للبيع 10 دينار للبيع ليتات زنون مع المحولات 1 دينار للبيع تانكي مياه نظيف لاعلى سعر غير مسروق للبيع كمية عدد 150 الف نوع من المكياج المظروب والاصلى والماركه والى ييب الامراض السعر خاص 2300 دينارين وثلاث امية فلس للبيع جيتي بدون دفتر ولا لوحات مسروقه السياره مقطوطه بجبد بحاله فوق الممتازه تحتاج تبديل زيت وبطاريه ومكينه وذراع جام وتواير وليتات وصبغ وشراء جير وتعديل البككس شرط الفحص عشان لا تقولون غشيتكم السعر 50 دينار قابل للمساومه موديل 77 عليها هوكر بو طزه للبيع خدامه اندنوسيه مسترجعه السعر 20 دينار بس هاه منحاشه لى صادوك مالى شغل ماعرفك للبيع كميه كبيره من التيلفونات 500 جهاز نوكيا حديث وقديم واشاكال اخرى مانعرفها مصرولا وسونى سركسون السعر 100 دينار عليه ضمانى لمدة ساعه كفاله اوكى اى شى تبونه انا حاضر طبعن اخوكم بدون وطن اى نسيت اقولكم للبيع تاير طياره جديد غير مستعمل وعلى يوم راح اصير طيــــــــــــــار

والله مو صج اللي قاعدين نشوفه والله حرام الله ما يرضا الله ما يرضا !!! انا اقول بدال لا تجنسون الهيلق جنسوهم هذولا اللي اجدادهم حاربو عشان لكويت وضحو بكل مايملكون عشانها هذا جزاهم بالنهاية ؟!!

الي متى الغفلة

خير الكلام ما قل ودل :)

الكل يطالبني أكتب امعرب ماشي انا ممكن اكتب امعرب بس مو الكل يفهم المعرب عدل وأعتقد اللغه العربية أوضح وأجمل من ناحية المعنى والمفهوم فأعتذر ، ومن ناحية ثانية انا راح اكتب مواضيع مختصرة وان طالت حدها حدها 14 سطر لا يتعدى لأن انا أؤمن بالقول ( خير الكلام ما قل ودل ) واللي ما عجبتهم كتاباتي فأقولهم عادي خيرها بغيرها شكو لالا جد اقولهم اليايات اكثر :) وانشالله خير يلا جااااو اييي صح اما بالنسبه حق القصه الفصل الثاني انشالله السنه اليايه نفس التاريخ كاااك لالا اتغشمر !

سجينة في غرفة سوداء

" ليت هناك زر قريب مني أضغط عليه فيسود كل من حولي الهدوء والسكينة " كلمات بدرت مني كلمات فتاة سجينة في غرفة سوداء يعمها الغموض والازعاج والضجيج الذي لايتوقف ... ليت الحياة ممات والممات حياة ولعل هذا هو قدري ؟ هل للحياة معنى آخر ومفهوم لم يتضح لي بعد أم انني سأعيش طيلة حياتي داخل هذه الغرفة الموحشة ؟؟ تساؤلات وتساؤلات ولطالما تساءلت ولطالما دارت هذه الأحاديث بيني وبين نفسي العديد من المرات وكأنه أمر اعتدت عليه واعتاد عليه عقلي .. أتساءل ولا أجد جواب واحد يشبع أسئلتي هل هذا هو مصيري أظل سجينة غرفة سوداء؟ فكيف السبيل الى الخروج وانا في الحقيقة وفي الواقع كما يقولونه وقلت يقولونه لأنني لا أعرفه ولم أرى الواقع في حياتي هو كالهواء أتنفسه وأعيشه لكنني لا أراه ماهو الا مجرد حلم وكابوس , فعلى الرغم من انني في واقع الحياة أخرج وأذهب وأعود وأتحرك وأضحك وأبتسم الا اني أظل سجينة في غرفتي السوداء المظلمة جدرانها تحيط بي لا ترحل عني لا تتركني لا تزاولني .. تقتلني ترهبني أخاف من الخروج أخاف ان اتخطى جدرانها رغم ما يراه الناس في من قوة عزمي وشجاعة رأيي وجرأة قولي ودهاء عقلي لكن قوتي تتلاشى تختفي لا أعرف لها معنى ولا وجود , لم كل نظرات الاعجاب هذه فأنا لا استحقها ما لابتسامتي ترتسم على وجهي ؟! وكيف وانا حتى لا أعرف كيف أرسمها !! مشاعري ماتت ترى من أحياها ؟؟, لست سوى حطام انسانة مزقها الغدر والناس في نظري دمى متحركة .... يتبع

V i P

اذا غضب كبريائي ... اممم ودي أغيّر مفهوم الVip لو بسأل أحد شنو يعني vip ؟ بيقولي واحد واصل شي رزه شي عالي محد يوصله الخ ... بقولك لاء :) هذا يمكن ابمفهومكم أما انا عندي تعريف ثاني للكلمة, كنت أعرف وحده الله يذكرها بالخير مره كنت زعلانه ومتضايقه لأبعد درجه وكانت قاعده تحاول تسولف معاي وانا مطنشتها مع العلم اني ماحب اكون قاعده مع احد بطلعه ولا بمكان واطنش فيه احس اني أخرب جو الطلعه , فانصدمت من طريقتها بالتعامل معاي ! طبعا كلنا لما نزعل شي طبيعي بيحوشكم هالنوعيه اللي تقعد بدال لا يراضيك يزيد الطين بله يحنجها ويحن على راسك يلا قول واشفيك اشصاير متضايق من جذي تقوله لاء يقولك ها عيل من فلان تقول لاء ها عيل مني !! تحس ودك ترقعه بأقرب شي يمك , اما اهيا ما سألتني من شنو وليش غير مره وحده ولما شافتني ما رديت قالتلي كلمه وهالكلمه انا اعتبرتها اضافه يديدة حق مفاهيمي واهيا ان مهما كانت مشاكلج فاعتبري نفسج مميزة لاحظتو اشلون الكلمة داشه غلط وبوقت سلبي بالضبط انا مني شدت انتباهي بمعاملتها وخلتني اطالعها بنظرات كلها اسئله وجني اقولها كملي ولا تقولي ادري بتقومين تطقيني ولا اقاطعها لالا والله عادي كملي ليش مميزة ؟؟ قالت الآية ( لا يكلف الله نفسا الا وسعها ) الله ما يحملنا فوق طاقتنا والله اختارج تواجهين هالمشاكل لان فيج شي يميزج ولان الله يعلم انج قادره تواجهينها .. وخلصت كلامها وانا قعدت افكر واقلب كلامها ابراسي لين وصلت حق مفهوم ال vip , مثال توضيحي انا سقطت ابماده ولا فشلت اباختبار شي طبيعي راح اتضايق وانا ماقولكم لا تتضايقون بس تاخذ فتره تتضايق فيها وبعدها تقول حق نفسك انا Vip , موشرط اكون واصل ولا عندي ملايين عشان اكون Vip , انا اقدر اصير VIP بذاتـــي بشخصيتي باختياراتي بطريقة حياتي و مواجهة أغلاطي

شخبوطه

كان الكل يسألني شنو يعني شخبوطه ؟؟ ماله معنى ماله هدف ؟؟ وكنت اقول في نفسي لاء احنا اللي مالنا معنى ولا هدف لأن عطينا لكل شغله لكل شي بحياتنا مفهوم محدد وخلاص ! انا بصراحه عندي قناعه تقول : اختياراتك هي رموز شخصيتك يعني عشان أكون واضحة كل شي نختاره بحياتنا يرمز حق صفه ولا مجموعة صفات فينا مثال سريع انا ممكن أفرق بين شخصية شخصين عن طريق روتين حياتهم اللي روتينه منظم ويعرف شنو بيسوي باليوم هذا 100% عنده هدف بحياته عايش عشان شغله ، والثاني يقعد من النوم اروح مرينا ولا اروح الافينوز ؟ اروح الشاليه ولا اقعد بالدوانيه احسنلي ؟ هذا أضمن لكم ماعنده هدف ولو ظل على هالروتين راح نشوف ان شخصيته من أتفه الشخصيات في المجتمع, من هالمنطلق أوضح لكم شنو يعني شخبوطه في مفهومي وليش اخترته كنك نيم يختصرني الشخبوطه عباره عن خربشة بالقلم ولا بالألوان وهذي الخربشة لما نشوفها نعرف ان الانسان اللي شخبط يا انه زهقان ومايدري شيسوي ولا قاعد يفكر بشي يضايقه ولا ابساطه ماكو هدف أو غرض منها ! بالضبط انا لاحظت اني كنت مثل الشخبوطه في حياة كل الناس اللي عرفتهم وجودي مثل عدم وجودي كنت بدون هدف بحياتهم كنت أؤثر فيهم بس تأثير مثل الشخبوطه ماله أي غرض أو قيمه بسرعه ينمحي تدرون ليش لاني كنت انسانه سلبية وكنت في حالة من الكآبه والبؤس مايعلم فيها غير الله كنت اقعد ومادري شسوي وين اروح شنو انا ؟ همي بس أؤذي غيري المهم اني اشغل نفسي لا واذا أحد كان يبي يدش هوشة ولاشي نادوني وتذكروني ليش انا سألتهم بيوم وسمعت الجواب اللي صدمني وغيرني قالولي لأنج ماتحسين !!

الهدف من طرح ونشر أفكاري الخاصة؟

بداية انا اتمنى من الله اني ابيوم اوصل لمرحله ومحطة أكبر من خلالها انشر أفكاري لكن بالطبع كل شي يبدأ صغيرا ثم يكبر, راح اكتب في هذه المدونة كل ما يسعني كتابته وكل ما يمكن حصره من خبرات وتجارب سواء انا عشتها او غيري , ولن يقتصر محتوى مدونتي على ذلك فقط بل سأنتقد وأعرض مواضيع وأناقش وأتحاور , أولا من أكون :
انا عايشة العلي بنت كويتية وأفتخر وأحب الكويت منو فينا ما يحب لكويت ؟ لأن الكويت غالية على قلبي وأكيد على قلوبكم فكرت وفكرت شنو اللي ينقصنا احنا الشعب الكويتي ؟ شنو ممكن أغير وين ممكن نصير؟ ، عرفت الحل مو بالمجلس ولا بفلان ينفع فلان عرفت الحل داخلنا اهو حل بسيط وصغير كلنا تجاهلناه وغضينا النظر عنه الحل نغير نفسنا نغير طريقة تفكيرنا نتغير من الداخل .. واحدى قناعاتي (التغيير الداخلي انعكاس للتغيير الخارجي ) .

- ثانيا شخصيات برزت في حياتي :
لكل منا شخصية طبعا وهذه الشخصيه لا يختلف اثنان على ان 90% من السمات والصفات التي تجسدت في شخصياتنا هي بسبب الأفراد الذين تأثرنا بهم في حياتنا , من الشخصيات التي ساهمت في تشكيل شخصيتي :) سأذكر البعض منهم والبعض الآخر لن يتم ذكره لأسباب شخصية وأوجه اعتذاري لأي شخص لم يتم ذكره على ان اكون نسيت او غفلت عن ذكره
-الوالده الله يخليها لي : خذيت منها حكمتها نظرتها المتفائله للأمور يعجبني فيها ابتسامتها التي لاتفارقها , لها اطلاله وجاذبيه شخصيه تحب تتغشمر وتضحك الناس وتهتم لسعادة غيرها اكثر من سعادتها
- الوالد بابا حبيبي : ماكو اطيب منه رغم اني اتزاعل معاه وايد وعلاقتي معاه مو ذاك الزود بس ابوي يبهرني بطيبته وتواضعه وثقته بنفسه وشكثر يعرف نااااس كل ما اطلع معاه مشوار يسلم على احد خذيت منه طيبته و عفويته
- خالد الرشيدي : هذا الانسان بالذات ما أوفيه حقه بصراحه منطق وذكاء وعقل واخلاق وأكثر الناس اللي أثروا فيني رغم قلة تواصلي معاه الا انه كان يقولي كلمه ويغرس فيني فكره ما انساها
- فاطمه : هذي رفيجتي واختي وحبيبتي انسانه ماتوقعت بيوم أرافجها كنا اربع صديقات كلنا تفرقنا وظليت انا وياها واهيا علمتني الصبر :)

ثالثا أهدافي في الحياة :
- أصير انسانه عظيمة في يوم من الأيام
- أغير أو على الأقل أترك أثر في الحياة
- أحقق كل أحلامي العلمية والعملية والحياتية
- ينجح مشروعي المستقبلي ويكون له بصمه


شعاري ( لا أريد ان أكون مجرد امرأة جميلة أخرى, بل امرأة جميلة تحدث تغييرا في العالم )