قولوا آميـــــــــن الله يعز لكويـــت

بداية سوريييي انجنيز :) والله غلطه مادري ان الموضوع اساسا تم نشره بالبلوق ماعلينا .. مادري اذا سامعين اغنية نبيل شعيل اليديدة قولو آمين الله يعز لكويت كل يوم أسمعها بالسياره وابتسم وأشوف اللي يمي بالاشارة يقولون اشفيها هذي !!! انزين اخترت كلمات الاغنية تكون عنوان للبوست لأن بصراحة ما لقيت عنوان يصف اللي أحسه أمس واحنا قاعدين بالزواره ( زيارة عائليه) انزين صدمني الحديث اللي دار بين امي وخالتي
امي : المرشحة الفلانية شرايج نروح نصوتلها
خالتي : لالا شايفة شلون لابسه حجابها
امي : اي انا اقول ليش حجابها قطته غريبه مو مثل قطتنا
خالتي : اي يقولون انها (......) <----تم ذكر اسم مذهب ولا حاجة لذكره :) عشان محد يزعل
طبعا عقب هالكلام اللي انا سمعته وهذا يعني جزء بسيط من الحجي اللي سمعته واللي قدرت أقوله حسيت بطراق قوي للأسف الظاهر مثل ما قال أبوي ماعاد فيها كويت :) انا بقسم لكم الموضوع ثلاث أوجه عشان توصل الفكرة بسهولة

أولا : المرأة والمجلس

لاشك ان للمرأه هالمره فرصة كبيرة للنجاح والوصول الى كرسي المجلس والفضل يعود للرجال أنا اقولكم ليش بما أن ثقة الشعب صارت مهزوزة بالرجال واحنا نعرف ليش صارت مهزوزة فهذا حافز قوي للمرأه والدليل ان كثير من النساء دشو في هالانتخابات لكن السؤال اهني يا اخواني هل المرأة عندها الكفاءة انا اقولها لكم وبكل صراحه لاء للأسف احنا المجتمع النسائي بالكويت من أسوء المجتمعات النسائيه في العالم بعد ! فلانه ماتحب فلانه فلانه تغار من فلانه فلانه تحش بفلانه وين نكون على قلب واحد ونصوت لأجل الكويت؟؟


ثانيا : الرجل والمجلس
الله يستر الله يستر انا اتمنى ان الرياييل هالمره يبيضونها وكفانا ما يانا اذا كل شوي سمو الأمير حفظه الله ورعاه ويطول لنا بعمره يارب بيحل المجلس فهذه مصيبة صرنا مضحكه وأضحوكه للغرب وللعالم أجمع ! صراحه انا أقولها وبكل أمانة لو ظل الوضع مثل ماكان وما شفنا أي تطور يحلون المجلس وخلاص مانبي مجلس لين نصير على قلب واحد ونعرف شنو الكويت وشنو أهميتها انا بقولكم موقف صارلي ويهي صار كبر ايدي من الفشله قاعدين بكوفي شوب بالامارات ولا التلفزيون حاطينا على الاخبار ماشوف الا تقرير عن الكويت واثنين من الاخوان النواب جزاهم الله خير قاعدين يتساببون !! والله عوار قلب ماقول الا نبيها خمس لووول


ثالثا : الرجل المرأة والمجلس

اييييييييي مني يصير الحجي يقولك عشان تصير نائب وتمثل هالدولة الحبيبة الغالية وتتكلم باسم الدستور لازم على الأقل تتمتع بأهم صفات الدستور وهي الديموقراطية والدبلوماسية أخيييه يا يما وين :) كلامي موجه لرياييل اي نعم انا مو قاعده اهاجم بس صدمني موقف البعض من النواب اللي عارضو فكرة دخول المرأة البرلمان وكل واحد طلعله عذر ولكن والله ان ولا عذر يقنعني كلها أسباب زائفة انا متأكده ان السالفة سالفة نحااااااااااااسة لووول اي نعم نحاسة الريال ما يبي المرا تناشبه وتكون معاه بكل مكان باختصار الرجل يخاف من فكرة وصول المرأة اليه


وبالنهاية ارد حق الحديث اللي دار بين امي وخالتي وانا لي تعليق صغيرون عليه اذا كان التصويت على أساس المصلحة فتلك مصيبة ولكن اذا كان على أساس المظاااهر فالمصيبة أعظمووووووووو سامحينا ياكويت :)