اذا غاب القط العب يا فار

في ظاهرة انتشرت في الآونة الأخيرة وهي السايتات الا أخلاقية او التي بالأحرى محتواها غير اخلاقي ولايمت للمجتمع الكويت بصلة ! انا اؤمن بالمثل اللي يقول اذا غاب القط العب يا فار بالضبط هذا الحاصل مع معظم بناتنا مستانسه الحبيبه مسويتلها سايت حطت فيه الأكو والماكو حتى صورة الأندر وير !! شنو يعني عشان اهلج ما عندهم علم وغافلين عنج تروحين تبيعين نفسج ولا تدرين هالسايت منو يدشه !! للأسف رغم تطورنا الشكلي الا احنا عقليا مخنا مو راضي يتطور بنت عمرها 14 سنه حاطتلي صور فاضحه ماما حبيبتي انتي شتطلعين شنو عندج تطلعينه ؟ ولا المصيبة الأعظم تحط صورها وصور رفيجاتها وصور معلماتها في المدرسة من دون علمهم !! انا بصراحه صدمتني صور بنات بالمتوسطة منسدحين على الأرض كل وحده ماخذه وضعيه غير شكل تقول انجلينا جولي مره مطلعه شورتها مره مطلعه سيقانها مره شوي وتقط ملابسها والله العظيم مو قادره اكمل واتحجى اعتقد يعني بس خلاص ماقدر اتمادى اكثر من جذي انا لو بيدي احط صورهم لكن ليش اخذ اثمهم الله يهديهم ... من هالمنطلق او من هالظاهرة أدش على ظاهره ألعن ألا وهي التعري مو التعري اللي عند روبي وهيفاء لاا هذا تعري على الطريقة الكويتية على الأقل روبي وهيفاء اجسامهم لا تؤذي العين ولا تصيب الواحد بالحكة النفسية مثل البنات المتاااااان ولابسين مرصرص غصب داش فيها والله اني اتحكك من اشوفهم احس ودي اقوم امسكها من راسها واكفخها بالطوفه يكسرون خاطري بالمحلات تدور مقاس ميديوم ولا سمول !! تشوف الميديوم والسمول مصفر بالمحل ماكو غير لارج واكس اكس لارج انزين والضعيفه شتسوي؟؟
وأخيرن ليس آخرن الشباب والعدسات الملونة ؟! أي أدري مو شي يديد بس ليش كل من هب ودب قام يحط عدسه ملونه صار الوضع عااادي قلنا شباب يسشورون شعورهم مشيناها يصبغون شعورهم مااشي عاد عدسات ملونة وحف الحواجب مادري الشخطه هذي يعني يكون عنتر زمانه صراحة ماعندي تعليق ماقول الا الله يهديكم
والظاهرة الأخيرة واللي خليتها ختام موضوعي هي حجاب بو تفخه مادري قوطي روب مادري شقامو بعد يسمونه المهم وصلت ! ايييي هذا الله يسلمكم ماراح اعور قلبي واتحجى بقول حديث الرسول عليه الصلاة والسلام (.....رؤوسهن كأسنمة البخت المائلة لايدخلن الجنة ولايجدن ريحها ...) ماكو أوضح من جذي
في الختام ماقول الا اذا الزلازل والعواصف والأحوال الجوية الغريبه اللي حاشتنا بالكويت ماهزت ضمائركم عيل متى تحسون؟